پاکستان، جنوبی افریقہ اور نیوزی لینڈ کے درمیان چیمپیئنز ٹرافی سے پہلے تین ملکی ون ڈے سیریز ملتان کے بجائے اب کراچی اور لاہور میں کھیلی جائے گی۔
پاکستان کرکٹ بورڈ (پی سی بی) کے جاری اعلامیے میں بتایا گیا ہے کہ ٹرائی سیریز اب ملتان کے بجائے کراچی اور لاہور کے نئے تعمیر شدہ اسٹیڈیمز میں کھیلی جائے گی۔
واضح رہے کہ تینوں ملکوں کے درمیان ٹرائی سیریز فروری کے دوسرے ہفتے میں کھیلی جائے گی جبکہ نیشنل اسٹیڈیم اور قذافی اسیٹڈیم میں تیاریوں کے حتمی مراحل میں داخل ہونے کے پیشِ نظر تین ملکی سیریز کو منتقل کیا گیا ہے۔
پی سی بی کے مطابق اسٹیڈیمز کے ترقیاتی کام مقررہ وقت میں مکمل کرکے دونوں اسٹیڈیمز میں 3 ملکی ون ڈے سیریز کے میچز کرائے جائیں گے۔
نیشنل بینک اور قذافی اسٹیڈیمز اور کی تعمیر نو
دوسری جانب چیمپئنز ٹرافی کے لیے لاہور میں قذافی اسٹیڈیم کی گنجائش 35 ہزار تماشائیوں تک بڑھا دی گئی ہے اور پورے اسٹیڈیم میں نئی کرسیاں بھی لگائی گئی ہیں، اسٹیڈیم میں براڈکاسٹ کے معیار کو بہتر بنانے کے لیے 480 جدید ایل ای ڈی لائٹس نصب کی گئی ہیں جو شائقین کو شاندار کھیل دکھانے میں اہم کردار ادا کریں گی۔
تماشائیوں کے تجربے کو مزید بہتر بنانے کے لیے 2 بڑے ڈیجیٹل ری پلے اسکرینز آئندہ ہفتے نصب کی جائیں گی، قذافی اسٹیڈیم کا تعمیراتی کام جنوری کے آخری ہفتے میں مکمل ہوگا۔
لاہور کے اسٹیڈیم کی طرح کراچی کے نیشنل بینک کرکٹ اسٹیڈیم میں بھی تعمیراتی کام جاری ہے، اسٹیڈیم میں کھلاڑیوں اور آفیشنلز کے لیے نیا انکلوژر بھی بنایا گیا ہے، اس کے علاوہ 350 ایل ای ڈی لائٹس نصب کی گئی ہیں تاکہ فینز بہترین کھیل سے محذوذ ہوسکیں۔
اسٹیڈیم میں دو ڈیجیٹل ری پلے اسکرینز پہلے ہی نصب کی جاچکی ہیں جبکہ 5 ہزار نئی کرسیوں کو بھی لگایا گیا ہے۔
اسٹیڈیمز میں تزین و آرائش کے ساتھ ساتھ پچ اور آؤٹ فیلڈ کو بہتر بنانے کے لیے آسٹریلوی کیوریٹر ٹونی ہیمنگ کی سربراہی میں پی سی بی کیوریٹرز نے بھرپور محنت کی ہے۔
