کراچی (ویب ڈیسک)اطالوی اورینٹیئرنگ ایتھلیٹ متیا دیبرٹولیس منگل کو چین کے شہر چنگدو میں ہونے والے ورلڈ گیمز کے دوران مقابلے میں گرنے کے بعد انتقال کر گئے، منتظمین کے مطابق 29 سالہ دیبرٹولیس 8 اگست کو اورینٹیئرنگ ایونٹ کے دوران بے ہوش پائے گئے اور 4 روز بعد چل بسے۔
خبر رساں ادارے ’اے ایف پی‘ کی رپورٹ کے مطابق یہ اطلاع ورلڈ گیمز اور انٹرنیشنل اورینٹیئرنگ فیڈریشن (آئی او ایف) کے مشترکہ بیان میں دی گئی۔
ورلڈ گیمز ہر 4 سال بعد ہونے والا ایک ملٹی اسپورٹ ایونٹ ہے جس میں وہ کھیل شامل ہوتے ہیں جو اولمپکس کا حصہ نہیں ہیں۔
بیان میں کہا گیا کہ ’چین کے ایک بڑے طبی ادارے میں فوری اور ماہر طبی امداد ملنے کے باوجود وہ جانبر نہ ہو سکے‘، موت کی وجہ کے بارے میں کوئی تفصیل فراہم نہیں کی گئی۔
اورینٹیئرنگ میں کھلاڑی ایک غیر نشاندہ شدہ راستے پر نقشہ اور کمپاس کے ذریعے تیزی سے مقررہ مقامات پر پہنچتے ہیں اور ہر پوائنٹ پر اپنی موجودگی درج کراتے ہیں، یہ ایونٹ چنگدو کے مرکزی علاقے سے تقریباً 50 کلومیٹر دور شدید گرمی اور نمی کے ماحول میں ہوا، جہاں درجہ حرارت 30 ڈگری سینٹی گریڈ سے زائد تھا۔
مشرقی اٹلی کے علاقے پریمیرو سے تعلق رکھنے والے دیبرٹولیس مردوں کے مڈل ڈسٹنس ایونٹ کے فائنل میں حصہ لے رہے تھے جب وہ گر پڑے، چھ کلومیٹر طویل اس راستے میں 180 میٹر کا چڑھاؤ اور 20 کنٹرول پوائنٹس شامل تھے جن پر کھلاڑیوں کو لازمی جانا تھا، ورلڈ گیمز کے سوشل میڈیا اکاؤنٹس پر جاری فوٹیج میں کھلاڑیوں کو کھیتوں اور دیہات سے گزرتے ہوئے دکھایا گیا۔
سوئٹزرلینڈ کے ریکارڈو رانکان نے یہ کورس 45 منٹ 22 سیکنڈ میں مکمل کر کے طلائی تمغہ جیتا، انہوں نے چینی سرکاری میڈیا سے گفتگو میں کہا کہ ’مجھے گرم اور مرطوب حالات کے ساتھ جلد ہم آہنگ ہونا پڑا، اور میرا خیال ہے کہ میں نے یہ کام کافی اچھی طرح کیا‘۔
دیبرٹولیس کا نام آفیشل نتائج میں ’ڈِڈ ناٹ فنش‘ (مکمل نہ کر سکے) کے طور پر درج کیا گیا، ان کے ساتھ مزید 11 کھلاڑی بھی فینش لائن تک نہ پہنچ سکے، آئی او ایف کی ویب سائٹ کے مطابق وہ مردوں کی عالمی رینکنگ میں 137ویں نمبر پر تھے اور 2014 سے مقابلوں میں حصہ لے رہے تھے، وہ اطالوی ٹیم کے ساتھ کئی ورلڈ چیمپئن شپ اور ورلڈ کپ ایونٹس میں شریک ہو چکے تھے۔
تربیت کے ساتھ ساتھ دیبرٹولیس اسٹاک ہوم میں قائم کے ٹی ایچ رائل انسٹی ٹیوٹ آف ٹیکنالوجی میں پی ایچ ڈی کر رہے تھے جہاں وہ مقیم تھے۔
یہ ورلڈ گیمز کا 12واں ایڈیشن ہے جو 17 اگست تک جاری رہے گا، جس میں تقریباً 4 ہزار کھلاڑی 253 ایونٹس میں حصہ لے رہے ہیں، مردوں کا مڈل ڈسٹنس اورینٹیئرنگ ایونٹ چنگدو گیمز کا پہلا میڈل ایونٹ تھا۔
مشترکہ بیان میں کہا گیا کہ ورلڈ گیمز اور آئی او ایف اس سانحے سے شدید متاثر ہیں اور ایتھلیٹ کے اہل خانہ، دوستوں اور پوری اورینٹیئرنگ کمیونٹی سے دلی تعزیت کا اظہار کرتے ہیں۔
بیان میں کہا گیا ہے کہ ’ہماری دعائیں ان سب کے ساتھ ہیں جو اس واقعے سے متاثر ہوئے، منتظمین متیا دیبرٹولیس کے اہل خانہ اور اورینٹیئرنگ کمیونٹی کی ہر ممکن مدد جاری رکھیں گے‘۔
