سابق قومی کپتان اور وکٹ کیپر راشد لطیف کا کہنا ہے کہ اگر بابر اعظم جیسے بیٹر کے لیے ٹی ٹوئنٹی ٹیم میں جگہ نہیں تو پھر سلمان علی آغا کی شمولیت پر غور بھی بے معنی ہے۔
نجی ٹی وی سے گفتگو کرتے ہوئے راشد لطیف نے کہا کہ اگر دنیا کی نویں نمبر کی ٹیم میں تین سنچریاں اور تین نصف سنچریاں بنانے والا بابر اعظم شامل نہیں ہوسکتا، تو سلمان علی آغا کو ٹیم کے قریب آنا بھی ممکن نہیں۔
انہوں نے کہا کہ کرکٹ کارکردگی کا کھیل ہے، جذبات کا نہیں۔ اگر میری کارکردگی اچھی نہ ہو تو چاہے کسی سے تعلق اچھا ہو، ٹیم سے باہر جانا پڑے گا۔
واضح رہے کہ سلمان علی آغا نے ٹی ٹوئنٹی میں مجموعی طور پر 380 رنز بنائے ہیں، جن میں تیسرے نمبر پر 116، چوتھے نمبر پر 164، پانچویں پر 85 اور چھٹے نمبر پر صرف 11 رنز شامل ہیں۔
ایشیاء کپ 2025ء سے قبل بابر اعظم کی قومی ٹیم میں واپسی کے لیے سابق کرکٹرز بشمول شاہد آفریدی اور وسیم اکرم نے بھی آواز بلند کی ہے۔
