پاکستان میں شیڈول چیمپئنز ٹرافی 2025 کی جاری تیاریوں کا جائزہ لینے کے لئے انٹرنیشنل کرکٹ کونسل (آئی سی سی) کے 6 رکنی وفد نے نیشنل بینک اسٹیڈیم کراچی کا دورہ کیا اور تعمیراتی کام میں پیشرفت کے حوالے سے جائزہ لیا۔
ذرائع کے مطابق انٹرنیشنل کرکٹ کونسل کے 6 رکنی وفد میں براڈکاسٹرز اور ایونٹ مینجمنٹ اور کرکٹ آپریشنز کے اراکین شامل تھے۔
اس موقع پر پاکستان کرکٹ بورڈ (پی سی بی) کے ڈائریکٹر انٹرنیشنل عثمان واہلہ نے وفد کو نیشنل اسٹیڈیم کراچی کے حوالے سے تفصیلی بریفنگ دی۔
آئی سی سی کے وفد نے تعمیر ہونے والی نئی عمارت کا تفصیلی جائزہ لیا اور ترقیاتی کام بھی دیکھا۔
ذرائع کے مطابق وفد نے اب تک ہونے والے انتظامات پر اطمینان کا اظہار کیا، دورے کے دوران آئی سی سی نے ٹیموں کے ہوٹل کا بھی دورہ کیا اور انتظامات کا بغور جائزہ لیا۔
واضح رہے کہ میگا ایونٹ کا پہلا میچ میزبان پاکستان اور نیوزی لینڈ کے درمیان 19 فروری کو نیشنل بینک اسٹیڈیم کراچی میں کھیلا جائے گا۔
یاد رہے کہ آئی سی سی کو چیمپینز ٹرافی کے شیڈول کا اعلان قانونی طور پر 21 نومبر سے پہلے کرنا تھا، 20 نومبر کو ڈان نیوز نے رپورٹ کیا تھا کہ آئی سی سی کے لیے چیمپئنز ٹرافی 2025 کے حوالے سے پاک-بھارت تنازع درد سر بن گیا ہے اور آئی سی سی کا ہنگامی اجلاس بلائے جانے کا امکان ہے۔
آئی سی سی ون ڈے ورلڈکپ 1996 اور 2008 کے ایشیا کپ کے بعد پاکستان کو ایک عرصے بعد پہلی بار چیمپئنز ٹرافی 2025 کی صورت میں آئی سی سی کے کسی بڑے ایونٹ کی میزبانی ملی ہے، جس کے تمام میچز اگلے سال 19 فروری سے 19 مارچ تک پاکستان کے تین بڑے شہروں کراچی، لاہور اور راولپنڈی میں کھیلے جائیں گے۔
بھارت نے ایشیا کپ 2008 کے بعد سے پاکستان میں کوئی میچ نہیں کھیلا، جبکہ 13-2012 میں پاکستان کے دورہ بھارت کے بعد سے دونوں ممالک کے درمیان کوئی دو طرفہ سیریز بھی نہیں کھیلی گئی ہے۔
پاکستان کو گزشتہ سال بھی ایشیا کپ کی میزبانی ملی تھی لیکن بھارت نے پاکستان آنے سے انکار کردیا تھا جس کے بعد ہائبرڈ ماڈل کے تحت بھارت کے تمام میچز سری لنکا میں کھیلے گئے تھے، جہاں کولمبو میں فائنل میں بھارت نے سری لنکا کو شکست دے کر ٹائٹل جیت لیا تھا۔
پاکستان اس چیمپئنز ٹرافی میں دفاعی چیمپئن کے طور پر شریک ہوگا، آخری بار چیمپئنز ٹرافی 2017 میں ہوئی تھی جو پاکستان نے سرفراز احمد کی قیادت میں جیتی تھی۔
