آسٹریلیا کے اوپنر سے الجھنا اور بعد ازاں کندھا مارنے پر عالمی شہرت یافتہ بھارتی بیٹسمین ویرات کوہلی پر جرمانہ عائد کردیا گیا۔
بھارتی نشریاتی ادارے ’انڈیا ٹو ڈے‘ کی رپورٹ کے مطابق بھارت کے تجربہ کار بلے باز ویرات کوہلی باکسنگ ڈے ٹیسٹ کے پہلے روز ٹیسٹ ڈیبیو کرنے والے آسٹریلوی اوپنر سیم کونسٹاس کو کندھا مارنے پر پابندی لگنے سے بچ گئے، تاہم ان پر جرمانہ کردیا گیا۔
رپورٹ کے مطابق میلبورن کرکٹ گراؤنڈ (ایم سی جی) میں آسٹریلیا کے خلاف سیم کونسٹاس کے ساتھ جھگڑا کرنے پر ویرات کوہلی کو ان کی میچ فیس کا 20 فیصد جرمانہ عائد کردیا گیا۔
ویرات کوہلی کو میچ کے پہلے سیشن میں آسٹریلوی ڈیبیو کرنے والے کھلاڑی کو کندھا مارتے ہوئے دیکھا گیا۔
بعد ازاں، ویرات کوہلی کی میچ ریفری سے میٹنگ صرف 10 منٹ تک جاری رہی، سابق بھارتی کپتان نے انٹرنیشنل کرکٹ کونسل کے ضابطہ اخلاق کی خلاف ورزی کو تسلیم کیا۔
رپورٹ کے مطابق اس کے بعد ان پر لیول ون کے جرم کےارتکاب کا الزام عائد کیا گیا جو کہ میدان میں جسمانی طور پر ٹکرانے کی سب سے ہلکی دفعہ ہے۔
رپورٹ کے مطابق یہ بہت زیادہ قیاس آرائی کی جا رہی تھی کہ ویرات کوہلی پر ایک میچ کی پابندی عائد کی جائے گی جب یہ ظاہر ہوا کہ وہ 19 سالہ نوجوان کرکٹر کے ساتھ جان بوجھ کر ٹکرائے۔
میلبرن ٹیسٹ کا پہلا روز: بھارت کیخلاف آسٹریلیا کے 6 وکٹوں پر 311 رنز
رپورٹ میں کہا گیا کہ آئی سی سی کوڈ آف کنڈکٹ کے مطابق میدان میں جان بوجھ کر کسی کھلاڑی سے ٹکرانے کو اکثر لیول 2 جرم کا درجہ دیا جاتا ہے جس پر 3 یا 4 ڈی میرٹ پوائنٹس دیے جاسکتے ہیں، اگر کوئی کھلاڑی 24 ماہ کے دوران 4 ڈی میرٹ پوائنٹس حاصل کرتا ہے تو اس پر ایک ٹیسٹ میچ یا محدود اوورز کے 2 میچوں کی پابندی لگائی جا سکتی ہے۔
تاہم ویرات کوہلی کو صرف ایک دی میرٹ پوائنٹ دیا گیا۔
یاد رہے کہ گزشتہ ہفتے ویرات کوہلی باکسنگ ڈے ٹیسٹ میچ سے قبل آسٹریلیا کے شہر میلبورن میں ایئرپورٹ پر اجازت کے بغیر ویڈیو بنانے پر ایک خاتون صحافی پر برہم ہوگئے تھے۔
آسٹریلوی نشریاتی ادارے ’فاکس نیوز‘ نے ’سڈنی مارننگ ہیرالڈ‘ کے حوالے سے بتایا تھا کہ ’ ویرات کوہلی نے اس وقت رپورٹر سے شدید ناراضگی کا اظہار کیا جب وہ اپنے اہلخانہ کے ساتھ ایئرپورٹ سے روانہ ہو رہے تھے۔’
یاد رہے کہ آسٹریلیا نے 5 ٹیسٹ میچوں کی بارڈر گواسکر ٹرافی سریز کے چوتھے میچ میں بھارت کے خلاف پہلے روز کے اختتام پر 6 وکٹوں پر 311 رنز بنالیے ہیں۔
دونوں اوپنرز عثمان خواجہ اور ڈیبیو کرنے والے سیم کونسٹاس نے نصف سنچریاں بنائیں، ان کے بعد آنے والے مارنس لبوشین نے بھی 72 رنز کی اننگز کھیلی۔
پہلے روز کھیل کے اختتام پر اسٹیون اسمتھ 68 اور پیٹ کمنز 8 رنز کے ساتھ کریز پر موجود ہیں،م بھارت کی جانب سے فاسٹ باؤلر جسپریت بھمراہ 3 وکٹوں کے ساتھ نمایاں باؤلر رہے۔
