اسکاٹش جونیئر اوپن اسکواش ٹورنامنٹ میں پاکستانی کھلاڑیوں نے شاندار کارکردگی کا مظاہرہ کرتے ہوئے 4 مختلف کیٹیگریز میں ٹائٹلز جیت لیے۔ 3 دیگر ایج کیٹیگریز میں پاکستان کے پلیئرز نے تیسری پوزیشنز حاصل کیں۔
ایڈنبرگ میں منعقدہ ایونٹ میں پاکستان نے بوائز انڈر 17، بوائز انڈر 15، بوائز انڈر 13 اور گرلز انڈر 13 کیٹیگریز میں کامیابی حاصل کی۔
بوائز انڈر 17 میں پاکستان کے اذان علی نے سوئٹزرلینڈ کے لینڈرو ووگیل کو مات دے کر گولڈ میڈل جیتا۔ بوائز انڈر 15 کے فائنل میں حذیفہ شاہد نے سنگاپور کے ریحان سنگھ کے خلاف سخت مقابلے کے بعد 2-3 سے کامیابی حاصل کی۔
بوائز انڈر 13 کے فائنل میں پاکستان کے سہیل عدنان نے اسپین کے ایٹزل ریگیورو گارشیا کو 0-3 سے شکست دے کر ٹائٹل جیتا جبکہ گرلز انڈر 13 کیٹیگری میں ماہ نور علی نے بھارت کی دیوانشی جین کو شکست دے کر ٹائٹل اپنے نام کیا۔
دیگر کیٹیگریز میں بھی پاکستانی کھلاڑیوں نے نمایاں کارکردگی دکھائی۔ بوائز انڈر 13 میں سخی خان ترین جبکہ گرلز انڈر 15 میں سحرش علی اور گرلز انڈر 17 میں مہوش علی نے تیسری پوزیشن حاصل کی۔
